⁰¹Dou der ais n Jeuds feest was, ging Jezus noar Jeruzalem tou.
⁰²In dij stad ligt stoef bie Schoappoort n badhoes, op zien Hebreeuws Betzata; t het vief gallerijen.
⁰³In dij gaangen lag t vol mit zaiken: blinden, kreupeln en lammen.f + In summege handschriften staait: “Zai wachtten doar dat t wotter in bewegen kwam. 4 Aalgedureg kwam n bode van de Heer omdeel en den kwam t wotter in bewegen. Wèl den t eerst in t wotter kwam, wer beter, wat hom ook mor scheelde.” In veul belangrieke handschriften komt dit nait veur.f*
⁰⁵Doar was n man bie dij al achtendatteg joar zulfde kwoal haar.

⁰⁶Jezus haar hom liggen zain en kwam der achter dat man al zo laank zaik was. Hai vragt hom: “Wil ie geern beter worden?”
⁰⁷“Meneer,” zee zaike man, “k heb ja gain mensk om mie t wotter in te helpen as dat in bewegen komt. As ik den onderwegens bin, let n aander zok al in t wotter zakken.”
⁰⁸Jezus zegt tegen hom: “Kom in t èn, krieg joen metras en goa mor ais aan loop!”
⁰⁹Man was votdoalek vereg; hai kreeg zien metras en ging aan loop. Mor dij dag was t sabbat!
¹⁰ Jeudse laaiders zeden tegen man dij weer beter moakt was: “t Is sabbat en den magst dien metras èns nait oppakken.”
¹¹ Hai gaf beschaaid: “Dij mie weer beter moakt het, zee tegen mie: ‘Krieg joen metras en goa mor ais aan loop.’”
¹² “Wèl was t den wel, dij dat tegen die zegd het?” vruigen ze.
¹³ Mor man dij weer beter moakt was, wos nait wèl t west haar, omreden Jezus was stiekem tussen t volk doar verswonnen.