⁰¹Jezus vernam dat Farizeeërs heurd haren, dat e nog meer mensken tou zien leerlingen muik as Johannes en dat e dij ook deupte.
⁰²Nou ja, dat dee e nait zulm; dat deden zien leerlingen.
⁰³Dou ging e vot tou Judea oet, weerom noar Galilea tou.
⁰⁴Doarveur mos e dwaars deur Samaria.

⁰⁵Zo komt e in Sichar, n stad in Samaria, stoef bie t stok laand dat Jakob doudestieds aan zien zeun Jozef geven haar;
⁰⁶doar haar je Jakobswèl. Bekòf van raais luit Jezus zok bie wèl deelvalen. t Was om en bie mirregstied.
⁰⁷Den komt ter n vraauw oet dij kontrainen om wotter te putten. Jezus zegt tegen heur: “Mag k wat wotter van joe?”
⁰⁸Dat vruig e heur, omreden zien leerlingen wazzen stad ingoan om eterij op maart te kopen.
⁰⁹“Wat,” zegt dij vraauw oet Samaria tegen hom, “ie as Jeud, vroagen mie, n Samaritoanse, om drinken?” Jeuden willen ja gain gedounte mit Samaritoanen hebben.
¹⁰ Jezus zee weerom: “As ie ais wozzen wat God te geven het en wèl joe om drinken vragt, den zol ie hóm t vroagd hebben, en hai zol joe wotter geven hebben doar je van in levent blieven.”
¹¹ “Meneer,” zegt vraauw, “ie hebben èns gain putemmer en wèl is daip. Hou kom ie den aan dat wotter, doar je van in levent blieven?
¹² Bin ie den van meer pertansie as ons veurvoader Jakob dij ons dizzent wèl noaloaten het? Hai het ter ja zulm nog oet dronken! Net as zien zeuns en zien vij.”
¹³ “Elk dij van dit wotter drinkt, krigt vannijs dörst,” zee Jezus.
¹⁴ “Mor dij van t wotter drinkt dat ík hom geef, krigt nooit weer dörst. Dat wotter dat ik hom geef wordt n wèl in hom doar wotter oet brobbelt dat hom aiweg levent geft.”
¹⁵ “Meneer,” zegt vraauw, “geef mie dát wotter! Den krieg k gain dörst weer en huif k nait haildaal meer hierhèn om te putten.”
¹⁶ “Tou, roup joen man ais,” zegt Jezus, “en kom mit joen baaident weerom.”
¹⁷ “k Bin nait traauwd,” zee vraauw. “Zo is t mor net,” zee Jezus, “ie binnen nait traauwd.
¹⁸ Ie hebben traauwd west mit vief manlu, mor doar ie nou bie binnen, doar bin ie nait mit traauwd. t Is krekt zo as ie zeggen.”
¹⁹ “Meneer,” zegt vraauw, “k zai dat ie n profeet binnen!
²⁰ Ons Samaritoanse veurolders hebben hier op dizze baarg God vereren doan en ie Jeuden zeggen dat Jeruzalem t stee is doar lu God vereren mouten.”
²¹ “Neem mor van mie aan,” zegt Jezus, “tied komt dat mensken nait op dizze baarg en ook nait in Jeruzalem God, ons Voader, vereren zellen.
²² Ie Samaritoanen waiten ja nait wat of ie vereren. Wie Jeuden waiten aal wat of wie vereren, omreden Jeuden waiten hou God mensken redt.
²³ Mor tied komt, joa, t is al zowied, den zel God zien Gaist mensken aanpittjen om Voader te vereren zo as bie hom paast, en hom eerlieks aanbeden zo as hai dat wil.
²⁴ God is zulm Gaist, en allenneg deur kracht van dij Gaist kinnen mensken hom aanbeden zo as echt bie hom paast.”
²⁵ “k Wait dat Messias komt,” (dij “Christus” nuimd wordt),” zegt vraauw. “As dij komt, zel e ons ales oetstokken.”
²⁶ “En doar proat ie nou net mit!” zegt Jezus tegen heur.