Psaalms 110

⁰⁰¹Van David, n psaalm.
Dit is t wat de HEER tegen mien heer zee:

“Goa zitten aan mien rechterhaand,

totdat ik dien vijanden hènzet heb

as n voutenbankje veur dien vouten.”

⁰⁰²De HEER stekt dien machtege staf
tou Sion oet:

heers middenmaank dien vijanden.

⁰⁰³Dien volk is gewilleg as t leger opkommen mout.
Mit t haaileg feestklaid aan komt t jonkgoud

veur die veurndag as daauw bie t rodoagen.

⁰⁰⁴De HEER het sworen, en t zel hom nait muiten:
“Doe bist priester in der aiweghaid,

net as Melchisedek.”

⁰⁰⁵De Heer staait aan dien rechterhaand,
op dag van zien grammiedeghaid slagt hai keunenks aan stokken.

⁰⁰⁶Hai sprekt recht veur haaidense volken,
t ligt vol lieken, kopstukken slagt e aan stokken,

in t wiede veld.

⁰⁰⁷Hai drinkt onderwegens oet n beek,
doarom krigt hai rug weer recht.