Psaalms 56

⁰⁰¹Veur meziekmeester. Op wies van: Stille doef van vèrren. Van David, n stil gebed, dou Filistijnen in Gat hom grepen haren.

⁰⁰²Wees mie genoadeg, o God, want mensken loeren op mie,
haile dag brengen strieders mie in t naauw.

⁰⁰³Mien vijanden loeren haile dag,
verschaaident strieden tegen mie, tröts as ze binnen.

⁰⁰⁴Op dag dat ik baang bin, vertraauw ik op joe.

⁰⁰⁵Op God, – zien woord pries ik –
op God vertraauw ik, ik bin nait baang,

wat zol n mensk mie aandoun?

⁰⁰⁶Haile dag bruken ze woorden dij zeer doun
en bedenken ze kwoad tegen mie.

⁰⁰⁷Ze valen aan, ze loeren,
ze goan mien gangen noa,

ze loeren op mien levent.

⁰⁰⁸Ze zellen heur straf toch nait ontlopen?
Teun joen vergrèldhaid, God, en sloag heur deel.

⁰⁰⁹Mien omswaarven heb ie optaikend,
gait mien troanen in joen wotterzak.

Staait ales nait op joen boukrol?

⁰¹⁰ Op dag dat ik roup, zellen mien vijanden wieken,
want dit wait ik: God is bie mie.

⁰¹¹ Op God, – zien woord pries ik –
op de HEER, – zien woord pries ik –

⁰¹² op God vertraauw ik, ik bin nait baang,
wat zol n mensk mie aandoun?

⁰¹³ Aan joe, o God, heb ik beloftes doan,
mit daankovvers zel ik joe betoalen,

⁰¹⁴ ie hebben mien levent red van dood,
mien vouten woard veur stroekeln,

zodat ik veur joen ogen wandeln kin

in t licht van t levent.