24 Aandermoal luiten ze man dij blind west haar bie heur roupen. Ze zeden: “Sweer dast woarhaid zeggen zelst! Wie veur ons waiten dat dij man n minne is.”
25 “Of e deugt of nait, dat wait k nait,” zee e, “mor ain ding wait k aal: eerst was k blind en nou inains kin k zain.”
26 Dou zeden ze: “Wat het e den mit die doan? Hou het e dien ogen beter moakt?”
27 Hai zee: “Dat heb k joe al zegd, mor ie lustern ja nait. Woarom wil ie t nou nog weer heuren? Ie willen toch gain leerlingen van hom worden, net as dij aandern?”
28 Dou raagden ze hom oet en zeden: “n Leerling van hom! Dat bist zulm! Mor wie, wie binnen Mozes zien leerlingen!
29 Van Mozes wait wie dat God mit hom proat het, mor dizzent, wie waiten èns nait woar of e heerkomt!”