Johannes 8:48-59

⁴⁸ Jeuden zeden tegen hom: “Ie binnen n dikke Samaritoan! Der hoest n kwoaie gaist in joe, dat mout ja wel!”
⁴⁹ Mor Jezus zee: “Der hoest gain kwoaie gaist in mie. t Is net aansom: ik acht mien Voader hoog, terwiel dat ie mie verachten.
⁵⁰ Ik bin nait oet op aigen eer, dat dut n aander aal en dij kin der over oordailen.
⁵¹ Eerliekswoar: ain dij leeft noar wat of ik zegd heb, zel dood vervaast nooit in ogen kieken.”
⁵² Dou zeden Jeuden tegen hom: “Nou begriep wie dat ter n kwoaie gaist in joe hoest. Abraham is doudestieds sturven, profeten ook. Hou kom je der bie om te zeggen: ‘Ain dij leeft noar wat ik zegd heb, zel vervaast nooit gewoar worden wat doodgoan is!’
⁵³ Ie binnen toch nait belangrieker as stamvoader Abraham! Dij is oet tied kommen net as profeten. Wat verbeel ie joe aiglieks wel!”
⁵⁴ Jezus zee: “As ik miezulm eer, stelt dat niks veur. Mien Voader, dij eert mie en van hom zeg ie: ‘Hai is ons God,’
⁵⁵ mor ie waiten èns nait wèl of e is. Ik ken hom aal. As k zeggen zol: ‘Ik ken hom nait,’ den zol k net zo’n leugenpuut wezen as ie. Mor k ken hom ja aal en k leef noar wat e zegd het.
⁵⁶ Joen stamvoader Abraham het ter noar oetkeken om mien gloriedag mit te moaken. En dou e dij zain haar, was e slim blied.”
⁵⁷ Dou zeden Jeuden: “Ie binnen nog gain fiefteg en ie hebben Abraham zain?”
⁵⁸ “k Verzeker joe,” zee Jezus weerom, “eer Abraham der was, bin ik ter.”
⁵⁹ Dou pakten ze stainen van grond òf om hom der mit te gooien. Mor hai kroop bezied en ging tou tempel oet.