Johannes 8:37-47

³⁷ Dat ie van Abraham ofstammen, wait k ja wel. Toch wil ie mie dood hebben, want mien bosschop, doar wil ie nait aan.
³⁸ k Heb t over wat ik bie mien Voader zain heb. Ie doun toch ook wat joen Voader joe veurholdt?”
³⁹ “Wie hebben Abraham as stamvoader.” zeden ze. Dou zee Jezus: “As ie echt van Abraham ofstammen deden, zol je ook doun zo as hai.
⁴⁰ Mor nee, ie willen mie doodmoaken, en k heb niks aans doan as joe woarhaid deurgeven dij k van God heurd heb. Zukswat dee Abraham nait.
⁴¹ Ie doun net as joen voader.” Dou zeden ze: “Wie binnen gain onechten, wie hebben mor ain Voader en dat is God zulm.”
⁴² “As God eerlieks joen Voader was,” zee Jezus, “den zol je wies mit mie wezen. Ik bin ja bie God votkommen en nou bin k hier. k Bin nait oet miezulm kommen. Hai is t dij mie stuurd het.
⁴³ Wait ie den nait woarom t nait tot joe deurdringt wat ik zeg? Begriepen wat ik joe zeg, dat kin ie haildaal nait!
⁴⁴ Dat komt omreden ie stammen van duvel òf! En wat dij voader van joe in t zin het, dat wil ie ook. Hai het altied al n doodsloager west. Hai het nooit aan kaant van woarhaid stoan. Woarhaid en hai kinnen haildaal nait mitnkander. Hai het gain spier woarhaid in zok. Hai lugt altied en dat dut e, omreden t zit in zien oard. Joa, hai is alderdeegs stamvoader van leugen.
⁴⁵ Mor ik, wat ik zeg is woar en doarom leuf ie mie nait.
⁴⁶ Wèl van joe kin bewiezen wat k verkeerd doan heb? As k zeg wat woar is, woarom leuf ie mie den nait?
⁴⁷ Ain dij n kind van God is, lustert toch noar wat God zegd het! Doar snap ie niks van. Mor ja, ie binnen ja ook gain kinder van God!”