Johannes 8:25-36

²⁵ Zai bleven mor aanholden: “Wèl bin ie den?” “k Dou aans niks as joe dit oetleggen,” zee Jezus.
²⁶ “k Zol n haile bult over joe zeggen kinnen woarom k joe veroordailen kin. Mor allenneg wat k van hom hierboven heurd heb, geef ik deur, want dij mie stuurd het doar kin je ja van op aan.”
²⁷ Ze begrepen nait dat e t aalweg over zien Voader haar.
²⁸ “Eerst zel ie Menskenzeun nog op n hoge poal stoken hebben,” ging Jezus wieder. “Den zel je gewoar worden, dat ik bin wèl k zeg te wezen. k Dou niks op aigen bandevout, mor bloots wat mien Voader mie veurholden het, dat dou k.
²⁹ Hai het mie stuurd, mor hai is ook nog aalweg bie mie. Hai let mie nooit zakken, want ik moak hom t aaltied noar t zin.”

³⁰ Verschaaiden Jeuden dij hom dit apmoal zeggen heurden, kregen feduutsie in hom.
³¹ Tegen dijent zee Jezus: “As ie joe holden aan wat ik joe veurhol, bin ie echt volgelingen van mie.
³² Den zel je der achter kommen wat woar is. Doar wor je vrij man van.”
³³ Mor ze zeden: “Wie stammen òf van Abraham, en nog nooit heb wie ain zien sloaf west. Wat main ie aiglieks mit dat ‘vrij man’ worden?”
³⁴ “Dou der denk om,” zee Jezus tegen heur, “elkenain dij wat mins dut, is ter sloaf van.
³⁵ n Sloaf blift ter nait aal zien levent bie heuren, n zeun aal.
³⁶ Eerst as zeun n vrij man van joe moakt, bin je echt vrij man.