Handelingen 16:25-34

²⁵ Om middernaacht zongen Paulus en Silas in heur gebed God zien lof. Gevangenen lusterden noar heur.
²⁶ Inains kwam der zo’n swoare eerdbeven, dat gevangenis schudde op zien grondvesten. Doalek vlogen ale deuren open en sprongen bie elkenain boeien lös.
²⁷ Cipier schoot wakker. Dou e deuren van gevangenis openstoan zag, trok e n sweerd en wol e zokzulm van kaant moaken. Hai dochde ja: gevangenen binnen der vandeur.
²⁸ Mor Paulus raip zo haard as e kon: “Dou joezulm nait te kòrt! Wie binnen der ja altmoal nog!”
²⁹ Hai luit licht brengen, runde noar binnen tou en trillend over aal zien leden vuil e veur Paulus en Silas op knijen.
³⁰ Hai brochde ze noar boeten tou en zee: “Manlu, wat mout ik doun om red te worden?”
³¹ “Leuf in de Heer Jezus,” zeden ze, “den zel ie red worden. Ie en aal joen volk.”
³² Dou verkundegden ze de Heer zien woord aan hom en aan ale lu dij bie hom in hoes woonden.
³³ Dat aigenste uur van naacht nam e heur mit en wosk heur wonden oet. Vot ter noa luit e zok mit aal zien volk deupen.
³⁴ Dou brochde hai ze noar boven in zien hoes en zette heur n moal veur. En mit aal zien hoesgenoten vierde hai feest, omreden hai leufde nou in God.