36 n Dag of wat loater zee Paulus tegen Barnabas: “Wie mozzen nog ais weer bie ale steden langs doar wie de Heer zien woord verkundegd hebben, en kieken hou of t mit leerlingen staait.”
37 Nou wol Barnabas ook Johannes, dij Marcus nuimd wer, mit hebben.
38 Mor Paulus vuilde doar niks veur. Ain dij heur noa Pamfylië in steek loaten haar in stee van zok mit heur op t waark te gooien, zo’n man wol e nait mit hebben.
39 Ze kregen der zo’n spul over dat ze oetnkander gingen. Barnabas nam Marcus mit en voarde noar Cyprus.
40 Mor Paulus koos Silas en ging aan raais. Bruiers vertraauwden hom tou aan de Heer zien genoade.
41 Hai raaisde deur Syrië en Cilicië en muik doar gemaintes vastberoaden.
Handelingen 16
01Hai kwam ook in Derbe en Lystra. Doar trof e n leerling, dij haitte Timoteüs, zeun van n geleuveg Jeudske en n Griekse voader.
02Hai ston goud aanschreven bie bruiers in Lystra en Ikonium.
03Paulus wol hom mitnemen op raais. Zo luit e hom, mit t oog op Jeuden in dij kontrainen, besnieden: elkenain wos ja dat zien voader n Griek was.
04In steden dij ze op heur deurraais aandeden, gavven ze besloeten deur dij apostels in Jeruzalem nomen haren. Doar zollen ze zok aan holden.
05Zo kwammen gemaintes vaaster te stoan in t geleuf. Heur ledental wer doagelks groder.
06Dou trokken ze wieder deur kontrainen van Frygië en Galatië, omreden hillege Gaist huil t tegen dat ze in Asia bosschop brochten.
07Dou ze in buurt van Mysië kommen wazzen, perbaaierden ze noar Bitynië te raaizen, mor Jezus zien Gaist wol dat nait lieden.
08Ze trokken Mysië verbie en kwammen in Troäs, aan kust.
09Doar kreeg Paulus snaachts n vizioun. Der ston n man oet Macedonië veur hom. Dij nuigde hom: “Steek toch over noar Macedonië en help ons!”
10 Dou e t vizioun zain haar, perbaaierden wie votdoalek noar Macedonië, n Romaainse kolonie, òf te raaizen. Wie muiken der ja oet op dat God ons roupen haar om heur bliede bosschop te verkundegen.