Johannes 4:43-54

⁴³ Noa dij twij doagen raaisde hai òf noar Galilea.
⁴⁴ Jezus zulm haar al ais rondoet zegd dat ain dij van God oet sprekt nait eerd wordt in zien aigen kontrainen.
⁴⁵ Mor dou e in Galilea aankwam, wazzen mensken toch nait ofwiezend tegen hom, omreden ze haren zain wat e apmoal mit Pesach in Jeruzalem doan haar. Doar haren zai ja zulm ook hèn west.
⁴⁶ Zo kwam Jezus ook weer in Kana in Galilea, doar e van wotter wien moakt haar.
Doar was ook n hoge amtenoar oet Kafarnaüm, dij zien zeun doodzaik was.
⁴⁷ Dou dizze man heurd haar dat Jezus tou Judea oet in Galilea weeromkommen was, ging e noar hom tou en vruig hom mit te kommen om zien zeun beter te moaken, omreden dij lag op staarven.
⁴⁸ Jezus zee tegen hom: “Ie apmoal leuven eerst in mie as k grootse taikens zain loat.”
⁴⁹ Hoge amtenoar zegt tegen hom: “Meneer, kom toch mit, veurdat mien jonkje oet tied komt.”
⁵⁰ “Goa mor! Joen zeun blift leven,” zegt Jezus tegen hom. Man vertraauwde op wat Jezus zee en ging noar hoes tou.
⁵¹ Onderwegens kwammen zien sloaven hom al in muit mit t nijs: “Joen zeun is weer opknapt.”
⁵² Hai vruig heur sunt wanneer t beter ging. “Gustermirreg om ain uur verswon koors,” zeden ze.
⁵³ Zien voader besefte dat op aigenste tied Jezus zegd haar: “Joen zeun blift leven,” en ze kregen vertraauw in hom, man zulm en aal t volk bie hom in hoes.
⁵⁴ Dit was t twijde taiken dat Jezus in Galilea zain luit; dizze moal kwam e van Judea.