⁰¹Roup oet volle bòrst, bedapper joe nait,
zet joen stem oet as n bezuun.

Loat heuren aan mien volk hou rebels of ze binnen,

aan t hoes van Jakob zien zunden.

⁰²Aine dag noa aander vroagen ze noar mie,
mien wegen willen ze geern waiten,

of was t n volk dat gerechteghaid dut

en nait sloeren let t recht van heur God.

Om rechte beslizzens vroagen ze mie,

geern willen ze dicht bie mie wezen.

⁰³“Woarom zol wie vasten? Ie zain t ja toch nait!
Woarom ons zulm vernedern? Ie geven der ja gain acht op!”

Op dag dat ie vasten, bin ie nog op aigen veurdail oet

en beul ie joen sloaven òf.

⁰⁴Joen vasten lopt oet op kivven en kifken,
gemain sloag ie der mit voest op lös.

Nee, bie zoks vasten,

beroup ie hemel nait.

⁰⁵Is dat sums vasten zo as ik t geern hebben wil,
n dag doar lu zok klaain bie moaken?

Kop hangen loaten as n raait,

op grond liggen in zak en aask?

Nuim je dat sums vasten,

n dag doar de HEER nocht aan het?