Lucas 9:1-9

⁰¹Dou raip e de twaalm bie zok en gaf heur kracht en volmacht over ale kwoaie gaisten en zaiken.
⁰²Hai stuurde ze der op oet om God zien riek oet te roupen en om zaiken beter te moaken.
⁰³Hai zee tegen heur: “Neem niks mit veur onderwegens. Gain stòk en gain mat. Gain brood en gain geld. Ie maggen ook gain twij onderklaiden bie joe hebben.
⁰⁴Neem ie joen intrek woaraarns in n hoes, blief doar den en raais doarvandoan wieder.
⁰⁵Tegen ale mensken dij joe der nait in hebben willen, mout ie as ie oet dij stad votgoan, t stof van joen vouten ofschudden as bewies van heur schuld.”
⁰⁶Zai gingen van loug noar loug, preekten t evengelie alerwegens en muiken zaike lu beter.

⁰⁷Nou haar vörrelkeunenk Herodes heurd wat of ter aal veurvalen was. En hai wos nait recht wat of e der aan haar. Paardie lu zeden ja:
⁰⁸“Johannes is oet doden opwekt.” Weer aandern: “Ain van olde profeten is opstoan.”
⁰⁹Mor Herodes zee: “Johannes, dij heb ik ja kop ofhaauwen loaten. Wèl is dit den, van wèl of ik zukswat heuren dou?” En hai zee bie zokzulm: k Mout zain dat k hom benoader.