²⁷ bepoalden Jeuden en aanveerdden zai as veurschrift veur zokzulm en veur heur noageslacht en veur elkenain dij zok bie heur aansloeten zol, dat zai zunder mekaaiern ale joaren dizze baaide doagen vieren zollen zo as heur veurschreven was en op tied dij der veur steld was,
²⁸ en ook dat herdenken en vieren van dizze doagen in ale geslachten, in ale gezinnen en in ale steden wezen zol, om dizze Poerimdoagen nait bie Jeuden in onbruuk roaken te loaten en herinnern bie t noageslacht nait verkommern te loaten.

²⁹ Keunegin Ester, dochter van Abichaïl, schreef soamen mit Jeud Mordechai n twijde braif over Poerim om dizze zoveul meugelk gewicht te geven.
³⁰ Hai stuurde braiven aan ale Jeuden in ale honderdzeuventwinneg gewesten van Ahasveros zien riek, mit zegenwensken en woorden van verbondenhaid.
³¹ Doar ston in dat men dizze Poerimdoagen op bepoalde doagen vieren mos zo as Jeud Mordechai en keunegin Ester veur heur bepoald haren en zo as zai veur zokzulm en veur heur noageslacht tieden van vasten en van weekloagen bepoald haren.
³² t Veurschrift van Ester doar ze regels van t Poerimfeest in vastlegde, wer in n bouk optaikend.

Esther 10

⁰¹Dou legde keunenk Ahasveros belasten op aan t laand en aan aailanden in zee.
⁰²Aal zien grode en machtege doaden en n hail persies bericht over groothaid doar keunenk Mordechai mit bekled haar, binnen opschreven in t bouk van kronieken van keunenks van Medië en Perzië.
⁰³Want Jeud Mordechai was vernoamste, noa keunenk Ahasveros, hai was in aanzain bie Jeuden. Zien volk mog hom geern lieden, want hai zöchte t goie veur heur en kwam op veur t haail van zien haile volk.