Psaalm 148

⁰⁰¹Halleluja!
Pries de HEER vanoet hemel,

pries hom, hoog aan lucht,

⁰⁰²pries hom, aal zien engels,
pries hom, aal zien legermachten.

⁰⁰³Pries hom, zun en moan,
pries hom, ale stroalende steerns,

⁰⁰⁴pries hom, hoogste hemel,
en wotters, hoog boven hemel.

⁰⁰⁵Loat heur noam van de HEER priezen,
omreden, hai gaf bevel en zai werden schoapen,

⁰⁰⁶hai gaf heur stee veur aaid en aiweg,
hai gaf heur odders, dij veur aaltied bestoan.

⁰⁰⁷Pries de HEER van eerde heer,
zeemonsters en ale daibe oceoanen,

⁰⁰⁸vuur en hoagel, snij en dook,
störmwind, dij dut noar zien woord.

⁰⁰⁹Baargen en ale heuvels,
vruchtbomen en ale cederbomen,

⁰¹⁰ wilde daaiern en ale vij,
daaiern dij kroepen en vogels dij vlaigen.

⁰¹¹ Keunenks van eerde en ale volken,
vorsten en rechters op eerde,

⁰¹² jonges en wichter,
olden en jongen mitnkander.

⁰¹³ Loat heur noam van de HEER priezen,
omreden, zien noam allain is hoog verheven,

zien heerlekhaid omvoamt eerde en hemel.

⁰¹⁴ Hai geft zien volk aanzain,
foam aan aal dij bie hom in gunst stoan,

van kinder van Israël, van t volk dat hom noa staait.

Halleluja!