Handelingen van apostels 21 :27-37

²⁷ Dou dij zeuven doag zowat om wazzen, zagen Jeuden oet Asia hom in tempel. Ze brochten aal t volk in rebulie en pakten hom beet.
²⁸ “Help, Isrelieten!” raipen ze. “Dit is man dij overaal en aan elkenain n leer verkundegt dij schoa toubrengt aan t volk, aan wet en dizze stee, en nou het e ook nog Grieken in tempel brocht en dizze haailege stee schonden!”
²⁹ Eerder haren ze ja Trofimus oet Efeze mit hom in stad zain en ze dochten, Paulus haar hom in tempel brocht.
³⁰ Haile stad in opschudden! Der ontston n oploop van volk. Ze grepen Paulus en sleepten hom tou tempel oet. Op slag werden poorten sloten.

³¹ Dou ze hom ombrengen wollen, kreeg kommedant van bezetten bericht: hail Jeruzalem in rep en ruier!
³² Votdoalek luit e soldoaten en ofsieren aantreden en ging op heur òf. Dou zai kommedant en soldoaten zagen, schaaidden ze der gaauw mit oet Paulus te sloagen.
³³ Kommedant kwam op hom tou, rekende hom in en luit hom mit twij kettens boeien. Hai vruig, wèl of dat was en wat of e doan haar.
³⁴ Mor oet aal dat volk raip ain hom dit tou, aander dat. Deur dat keboal kon hai der nait achter kommen hou of t nou krekt zat. Hai luit hom noar kezèrn brengen.
³⁵ Dou e aan trappens tou was, kwam t zowied dat e deur soldoaten droagen worden mos: zo slim drongen mensken op.
³⁶ Aal t volk laip ja achter hom aan te roupen: “Vot mit hom!”