01Op daarde dag trok Ester n keunenksklaid aan en ging in binnenste veurhof van t keunenkliek pelaais. Doar bleef ze stoan, tegenover keunenkszoal. Keunenk zat op zien keunenklieke troon tegen ingang van zoal over.
02Dou keunenk keunegin Ester stoan zag, won zai zien genegenhaid, en keunenk langde Ester golden scepter tou dij hai in haand haar. Ester kwam dichterbie en kwam top van scepter aan.
03Keunenk zee tegen heur: “Wat is ter, keunegin Ester? Woar heb ie verlet om? Al is t ook haalfschaid van t keunenkriek, t zel joe geven worden.”
04Dou zee Ester: “As keunenk dat wat tou liekt, den zol keunenk vandoag mit Haman op t feestmoal kommen kinnen dat ik veur hom kloarmoakt heb.”
05“Hoal Haman opslag hier heer,” zee keunenk, “om te doun wat Ester wil.”
Zo kwam keunenk mit Haman op t feestmoal dat Ester kloarmoakt haar.
06Dou zai wien dronken, zee keunenk tegen Ester: “Wat is joen verzuik? t Zel toustoan worden. Woar ie om vroagen, al is t ook haalfschaid van t keunenkriek, t komt veur nkander.”
07“Wat ik hail geern wol, woar ik om vroag,” zee Ester,
08as ik genegenhaid van keunenk wonnen heb en keunenk t goud tou liekt om mien verzuik tou te stoan en hom te schikken in dat wat k vroag, loat keunenk den nog n moal mit Haman op t feestmoal kommen dat ik veur hom kloarmoaken wil. Den zel k keunenk mörgen beschaaid geven.”
09Blied en mit goud zin ging Haman dij dag vot, mor dou e in poort van keunenk zag dat Mordechai nait stoan ging en alderdeegs nait veur hom van stee kwam, wer e vergrèld.
10 Mor hai bedapperde zok en ging noar hoes tou. Hai luit zien vrunden en zien vraauw Zeres bie zok kommen.
11 Haman stokte heur oet hou riek of hai was, houveul zeuns of hai haar, mit houveul eer hai deur keunenk overloaden was en hou of hai verhoogd was boven vorsten en dainders van keunenk.
12 “Boetendes,” zee Haman, “het keunegin Ester behaalve keunenk, mie allain veur t feestmoal nuigd dat zai holden het, en veur mörgen het zai mie weer bie zok nuigd, soamen mit keunenk.
13 Mor wat heb ik doar aan zo laank as ik dij Jeud Mordechai in poort van keunenk zitten zai?”
14 Zien vraauw Zeres en aal zien vrunden zeden tegen hom: “Loat n poal moaken van fiefteg èl hoog en zeg den mörgenvroug tegen keunenk, dat men zol Mordechai doar op spietsen mouten. Noa tied kinstoe blied en wel mit keunenk noar t feestmoal goan.” Dat leek Haman goud tou en hai luit n poal kloarmoaken.
