t Evengelie volgens Lucas 6:27-38

Bijbelteksten

Bijbeltekst voor 22 februari 2025

²⁷ Mor tegen joe dij noar mie lustern, zeg ik: heb joen vijanden laif. ²⁸ Dou goud aan wèl of joe hoaten. Zegen dij joe vervluiken. Beed veur dij joe min behandeln. ²⁹ As ain joe op waang slagt, keer hom ook aander tou. As ain joen jak ofpakt, loat hom t hemd ook nemen. ³⁰ As ain wat van joe vragt, geef hom t. As ain wat nemt dat joenent is, vroag t nait weerom. ³¹ Zo as ie willen dat mensken joe doun, dou heur net zo. ³² As ie laifhebben dij joe laifhebben, wat veur daank kin ie doarveur verwachten wezen? Ook zundoars hebben ja laif dij heur laifhebben. ³³ As ie gouddoun aan wèl of joe gouddoun, wat veur daank kin ie doarveur verwachten wezen? ³⁴ Zundoars dounen dat ook ja. As ie lainen aan lu doar ie van hopen dat ie t weeromkriegen, wat veur daank kin ie doarveur verwachten wezen? Ook zundoars lainen aan zundoars om gliekeveul weerom te kriegen. ³⁵ Nee: heb joen vijanden laif. Dou heur goud en lain wat oet zunder te verwachten dat ie t weeromkriegen. Den zel joen loon groot wezen. Ie zellen kinder van Alderhoogste wezen. Hai is ja goud veur ondankboare en minne lu. ³⁶ Wees barmhaarteg zo as joen Voader barmhaarteg is. ³⁷ En oordail nait, den zel der over joe ook nait oordaild worden. Spreek vrij, den zel ie vrijsproken worden. ³⁸ Geef, den zel der aan joe geven worden: n goie, aanstampte, schudde, boorndevolle moat zellen ze joe geven. Mit zulfde moat doar ie mit meten, zel ie weeromkriegen.”