t Evengelie volgens Lucas 6:1-11

⁰¹t Gebeurde ais op n sabbat dat e tussen stokken koorn deurlaip. Zien leerlingen tepten oaren, dij ze tussen handen oetvreven om op te eten. ⁰²Gounent van Farizeeërs zeden: “Wat dou ie doar? Dat mag ja hail nait op sabbat!” ⁰³Jezus antwoordde heur: “Heb ie den nait lezen wat of David doan het dou hai en zien manlu honger haren? ⁰⁴Hou of e God zien hoes inging en teunbroden pakte, doarvan at en oetdailde aan zien manlu? Doar mag ja ook gainain van eten as allenneg priesters?” ⁰⁵Hai zee tegen heur: “Menskenzeun is boas over sabbat.” ⁰⁶Op n aander sabbat wol t gevaal dat e sinagoge inging en onderricht gaf. Doar was ain, dij zien rechterhaand was verschrompeld. ⁰⁷Schriftgeleerden en Farizeeërs huilen hom goud in de goaten of e op sabbat ook ain weer beter moaken zol, om n aanklacht tegen hom te vinden. ⁰⁸Mor hai haar deur wat ze in t zin haren en hai zee tegen man mit zien verschrompelde haand: “Goa ais stoan en kom noar veuren tou!” Man kwam in t èn en ging noar veuren tou. ⁰⁹Jezus zee tegen heur: “Ik vroag joe wat of mag op sabbat: goud doun of kwoad doun? Ain redden of omkommen loaten?” ¹⁰ Dou keek e kring rond en zee tegen man: “Steek joen haand ais oet!” Dat dee e, en zien haand wer weer beter, krekt as aander. ¹¹ Ze werden haildaal verbiesterd en pruiten der mitnkander over wat veur moatregels ze tegen Jezus nemen zollen.