⁰¹Jezus kwam vol van hillege Gaist van Jordaan weerom en wer deur de Gaist in woestijn rondlaaid. ⁰²Doar wer e vatteg doagen oetdoagd deur duvel. Aal dij tied at e niks, en dou dij vatteg doagen om wazzen, haar e honger. ⁰³Dou zee duvel tegen hom: “As ie Zeun van God binnen, zeg den tegen dij stain doarzo dat e brood worden mout.” ⁰⁴Mor Jezus zee: “Der staait schreven: ’n Mensk zel nait enkeld van brood leven.'” ⁰⁵Dou laaidde hai hom omhoog en luit hom in ain tel ale keunenkrieken van wereld zain. ⁰⁶Duvel zee tegen hom: “Ik zel joe aal heur macht en heerlekhaid geven. t Is mie ja in handen legd en ik geef t aan dij ik wil. ⁰⁷As ie mie aanbeden is t aalmoal joenent.” ⁰⁸Mor Jezus zee: “Goa vot! Der staait schreven: ‘Ie zellen de Heer, joen God, aanbeden en hom allain dainen.'” ⁰⁹Hai laaidde hom noar Jeruzalem tou, zette hom op raand van tempeldak en zee tegen hom: ¹⁰ “As ie God zien Zeun binnen, spring hier den es òf. Staait ja schreven: ‘Hai zel zien engels veur joe bestellen om joe te bewoaren’ ¹¹ en ‘Op heur handen zellen ze joe droagen, dat ie joen vout nait aan n vlint steuten zellen.'” ¹² Mor Jezus zee: “Der is zegd: ‘Ie zellen de Heer, joen God, nait oetdoagen.'” ¹³ Dou duvel mit aal zien oetdoagerij kloar was, luit e hom mit vree en wachtte zien tied òf.