Ester 1:13-22

¹³ Dou pruit keunenk mit wiezen dij kennes haren van wet en recht. t Was ja gewoonte om zoaken van keunenk veur te leggen aan ale wet- en rechtsgeleerden. ¹⁴ Dij hai t mainst vertraauwde, wazzen Karsena, Setar, Admata, Tarsis, Meres, Marsena en Memuchan, zeuven vorsten van Perzië en Medië, hoogsten in t riek. ¹⁵ Hai vruig: “Wat mout volgens t recht gebeuren mit keunegin Wasti? Zai het bevel van keunenk Ahasveros dat hovelingen overbrocht hebben, ja noast zok deellegd.” ¹⁶ Memuchan zee, doar keunenk en vorsten bie wazzen: “Keunegin het zok nait bloots tegen keunenk over misdroagen, mor ook tegenover ale vorsten en volken in ale gewesten van keunenk Ahasveros. ¹⁷ Wat keunegin doan het, zel ja bie ale vraauwlu bekend worden, van dij gevolgen dat zai heur mannen niks meer in reken hebben zellen as ze zeggen: ‘Keunenk Ahasveros het bevel geven om keunegin Wasti bie hom te brengen, mor zai kwam nait.’ ¹⁸ Vandoag nog zellen vorstinnen van Perzië en Medië, dij vernemen wat keunegin doan het, tegen keunenk zien vorsten net zo proaten, en dat wordt balstureghaid en grammiedeghaid zunder èn. ¹⁹ As keunenk t goud tou liekt zol der n keunenkliek bevel oetgoan mouten, opnomen in wetten van Perzen en Meden dat men t nait herroupen kin, dat Wasti nait weer bie keunenk Ahasveros kommen mag. Keunenk zol n aander vraauw stee van keunegin geven mouten, ain dij beter is as zai. ²⁰ As keunenk zo verordonnaaiert en men heurt dat in t haile riek – en groot is t zekerwoar – den zellen ale vraauwen heur mannen, van hoog tou leeg, mit respekt behandeln.” ²¹ Mit dit veurstel wazzen keunenk en vorsten t ains en keunenk dee noar Memuchan zien zeggen. ²² Hai stuurde braiven noar ale gewesten van keunenk, noar elk gewest in aigen schrift en noar ale volken in heur aigen toal, dat elke man boas wezen zol in zien hoes en spreken zol in toal van zien volk.