Ester 1:1-12

⁰¹In doagen van Ahasveros (aigenste Ahasveros dij regaaierde over honderdzeuventwinneg gewesten, van India òf tot aan Nubië tou), ⁰²in dij doagen, dou keunenk Ahasveros op zien keunenklieke troon zat in börg Susa, ⁰³richtte hai, t was in t daarde joar dat hai regaaierde, n feestmoal aan veur aal zien vorsten en knechten. t Leger van Perzië en Medië, ale lu van hoge komòf en vorsten van gewesten wazzen bie hom, ⁰⁴dou hai grode riekdom van zien keunenkschop teunde en aal zien pracht en proal – dag in dag oet, honderdtachteg doagen laank. ⁰⁵Dou dij doagen om wazzen richtte keunenk in boetenhof bie t keunenkliek pelaais n feestmoal aan van zeuven doagen veur aal t volk van hoog tot leeg dat in börg Susa touhuil. t Feest wer holden in binnenhof in toen van t pelaais. ⁰⁶Linnen en wollen blaauwsangen gedienen wazzen deur trezzen van linnen en roodsangen droad mit zulvern knoppen vastmoakt aan witmaarmern zoelen, golden en zulvern rustbèrren stonden op n vlouer van albast, witmaarmer, peerlmoer en kostboare stainen. ⁰⁷Om oet te drinken wazzen der golden bekers, gain twij geliek, en der was zat keunenklieke wien, noar men van n keunenk verwachten kon. ⁰⁸t Drinken ging noar regel van gain dwang. Keunenk haar overstes van zien pelaais goud instoekt dat men doun zol as elk loende. ⁰⁹Keunegin Wasti richtte ook n feestmoal aan veur vraauwlu, in t pelaais van keunenk Ahasveros. ¹⁰ Op zeuvende dag, dou keunenk wat doeneg was van wien, zee hai tegen Mehuman, Bizzeta, Charbona, Bigta, Abagta, Zetar en Karkas – de zeuven noaste hofdainders van keunenk Ahasveros – ¹¹ dat zai mozzen keunegin Wasti, mit keunenklieke kroon op, bie hom brengen om volken en vorsten zain te loaten hou mooi of zai was. Zai mog heur ja wel zain loaten. ¹² Mor dou t bevel van keunenk deur hofdainders aan heur overbrocht was, waaigerde keunegin Wasti om te kommen. Keunenk wer hoagels, joa, hai was glìn.