Ester 2:15-23

¹⁵ Dou Ester aan beurt was – dochter van Abichaïl, dij n oom was van Mordechai dij heur as dochter aannomen haar – vruig zai om aans niks as wat Hegai, bedainde van keunenk, heur aanroaden haar. Aalmoal dij Ester onder ogen kwam, moggen heur geern lieden. ¹⁶ Zo wer Ester bie keunenk brocht in zien keunenkliek pelaais, in tiende moand, dat is nou moand tebet, in t zeuvende joar dat hai regaaierde. ¹⁷ Keunenk ging van ale vraauwen t mainste van Ester holden. Zai kreeg van hom meer genegenhaid en laifde as ale aander wichter. Doarom zette hai heur keunenkskroon op kop en verhoogde heur tot keunegin in stee van Wasti. ¹⁸ Dou richtte keunenk n groot feestmoal aan veur aal zien vorsten en bedaindes, t Feestmoal van Ester. Hai gaf gewesten vrijdom van belasten en dailde geschenken oet noar men van n keunenk verwachten mog. ¹⁹ Der werden vannijs jonge wichter bie nkander brocht. In tied zat Mordechai bie keunenk in poort. ²⁰ Ester haar heur ofkomst en heur volk nait bekendmoakt zo as Mordechai heur instoekt haar, want Ester huil zok aan wat Mordechai zee, net as dou zai bie hom grootbrocht wer. ²¹ In dij doagen, dou Mordechai in keunenk zien poort zat, werden Bigtan en Teres, twij hofdainders van keunenk dij wacht holden mozzen bie deur, slim vergrèld. Zai perbaaierden keunenk Ahasveros om haals te brengen. ²² Mordechai wer t gewoar en hai vertelde t aan keunegin. Ester vertelde t aan keunenk, oet noam van Mordechai. ²³ Zoak wer oetzöcht en t bleek zo te wezen. Baaident werden op n poal regen en t wer in keunenks tegenwoordeghaid opschreven in kronieken.