t Evengelie volgens Lucas 6:12-26

¹² Doudestieds gebeurde t dat e noar baarg tou ging om te beden en haile naacht deur in gebed was mit God. ¹³ Dou dag aanbroken was raip e zien leerlingen bie zok en koos der twaalf oet, dij hai ook noam gaf van apostels: ¹⁴ Simon, dij hai ook Petrus nuimde, Andreas, zien bruier, Jakobus, ¹⁵ Johannes, Filippus, Bartolomeüs, Matteüs, Tomas, Jakobus, Alfeüs zien zeun, ¹⁶ Simon, mit bienoam Vrijhaidsstrieder, Judas, Jakobus zien zeun, en Judas Iskariot, dij verroader worden is. ¹⁷ Hai ging mit heur omdeel en bleef stoan op n vlak stee. Doar was n dikke koppel van zien leerlingen en n bult volk oet t haile Jeudse laand en Jeruzalem en ook oet kuststreek van Tyrus en Sidon. ¹⁸ Dij wazzen kommen om noar hom te lustern en om van heur kwoalen òf te kommen. Ook dij ploagd werden deur duvelse gaisten werden genezen. ¹⁹ Aal t volk perbaaierde hom aan te kommen, omreden der ging kracht van hom oet. En hai muik elkenain beter. ²⁰ Dou sluig e ogen op noar zien leerlingen en zee: “Zoaleg dij aarm binnen, t keunenkriek van God is joenent. ²¹ Zoaleg dij nou honger lieden, ie zellen overvloud hebben. Zoaleg dij nou reren, ie zellen lagen. ²² Zoaleg bin ie as mensken joe hoaten en as ze joe oetsteuten en belastern en joen noam tou schaande moaken om Menskenzeun zien wil. ²³ As dij dag komt, daans mor van bliedschop. Joen loon is ja groot in hemel. Op zulfde menaaier hebben heur veurolden ja doan mit profeten. ²⁴ Mor o wai joe, dij riek binnen! Ie hebben joen dail al had. ²⁵ O wai joe, dij nou overvloud hebben! Ie zellen honger lieden. O wai joe, dij nou lagen! Ie zellen kloagen en reren. ²⁶ O wai joe, as mensken joe priezen! Op zulfde menaaier hebben heur veurolden ja doan mit vaalze profeten.