2 Kronieken 9:13-31

¹³ Joarliekse inkomsten veur Salomo bedruigen zèshonderdzèsensesteg talent gold. ¹⁴ Doar kwam nog bie wat de kroamers en de handelslu aanbrochten, en wat de keunenks van Arabië en de stadholders van t riek aan gold en zulver veur Salomo opbrochten. ¹⁵ Keunenk Salomo luit twijhonderd grode schilden moaken van dreven gold; veur ain zo’n schild haar hai zèshonderd sjekel gold neudeg. ¹⁶ Wieder luit e nog drijhonderd lutje schilden moaken van dreven gold; veur zo’n lutje schild haar hai drijhonderd sjekel gold neudeg. Keunenk luit ze ophangen in t hoes Libanonbos. ¹⁷ Keunenk luit ook n grode troon van ivoor moaken, dij hai mit zuver gold besloagen luit. ¹⁸ Dij troon haar zès treden, n voutenbaank van gold dij aan troon vastzat en aan weerszieden aarmleunens mit n laiw der noast. ¹⁹ Ook stonden der op troontreden nog twaalf laiwen, aan weerskanten zès. Nog nooit eerder was der, in wat keunenkriek ook, zukswat moakt. ²⁰ Ale drinkbekers van keunenk Salomo wazzen van gold. En aal t aander serviesgoud in t hoes Libanonbos was ook van zuver gold; zulver was in Salomo’s tied niks in reken. ²¹ Keunenk haar ja schepen dij op Tarsis voarden mit scheepsvolk van Churam. Aal drij joar kwammen dij zogezegde Tarsisschepen weerom mit gold en zulver, mit ivoor en mit oapen en paauwen. ²² Keunenk Salomo wer op dij menaaier rieker en wiezer as aal aander keunenks op haile wereld. ²³ Ale keunenks van de wereld wollen geern bie Salomo op veziede kommen om te lustern noar de wieshaid dij God hom in t haart geven haar. ²⁴ Aalmoal nammen ze geschenken mit: dingen van zulver en gold, klaaieroazie, woapens, kruderij, peerden en ezels. Dat ging zo joar op joar. ²⁵ Salomo haar vaaierdoezend staalploatsen veur peernwoagens en twaalfdoezend man peervolk. Hai legerde heur in woagenkezernes en bie zien pelaais in Jeruzalem. ²⁶ Salomo regaaierde over ale keunenks tussen de Eufraat en t laand van de Filistijnen tot aan de grup mit Egypte. ²⁷ Deur toudoun van de keunenk was zulver in Jeruzalem net zo gewoon as stainen en was ter net zo veul cederholt as holt van wilde viegen in de vlakte van Sefela. ²⁸ Peerden werden veur Salomo aankocht in Egypte en aal aander landen. ²⁹ Aal t aander over Salomo, van zien beguntied tot aan loater tieden, staait opschreven in de kronieken van profeet Natan, in de profeetsies van Achia oet Silo en in de viziounen van de profeet Jedo over Jerobeam, zeun van Nebat. ³⁰ Salomo regaaierde van Jeruzalem oet vatteg joar over hail Israël. ³¹ Dou Salomo sturf, wer hai te rusten legd bie zien veurolden. Hai wer begroaven in de stad van zien voader David. Zien zeun Rechabeam wer in zien stee keunenk.