⁰¹Dou Salomo kloar was mit t beden, kwam der tou de hemel oet vuur omdeel en dat verteerde t brandovver en de vree-ovvers, en t haile hoes wer vol van glorie van de HEER. ⁰²Priesters konden der nait meer inkommen, glorie van de HEER haar t haile hoes ja vol moakt. ⁰³Dou ale Isrelieten zagen hou t vuur en de glorie van de HEER over tempel omdeel kwam, gingen zai op knijen, mit kop op grond en prezen de HEER: “Hai is goud, zien traauw komt ja gain èn aan.” ⁰⁴Keunenk en aal t volk brochten dou ovvers veur de ogen van de HEER. ⁰⁵Keunenk Salomo ovverde twijentwinnegdoezend stoks rundvij en honderdtwinnegdoezend schoapen en segen. Zo hebben keunenk en t haile volk tempel inwijd. ⁰⁶Priesters stonden op heur stee, Levieten stonden te zingen bie heur meziekinstermenten dij keunenk David nog moaken loaten haar om de HEER te priezen en zai zongen: “Zien traauw komt ja gain èn aan,” zo as David vrouger besteld haar. Priesters stonden mit heur trompetten tegen heur over en aal t volk was ter bie stoan goan. ⁰⁷Salomo wijdde t middelstok van t veurplaain veur de tempel in. Hai mos doar de ovvers kloarmoaken; t bronzen altoar dat hai moaken loaten haar, was ja laank nait groot genog veur de brandovvers, waaitovvers en t vet van de daaiern dij slacht wazzen. ⁰⁸Dou vierde Salomo zeuven doag laank t Loofhuttenfeest in n grode bieainkomst mit t haile volk Israël, van de weg noar Hamat òf tot aan de grup mit Egypte tou. ⁰⁹Op de aachtste dag huilen ze n grode en plechtege soamenkomst. t Haile feest van t inwijden van t bronzen altoar duurde dou ook nog zeuven doag. ¹⁰ Op n drijentwinnegsten van zeuvende moand luit Salomo heur aalmoal weer noar hoes tou goan. t Volk haar t goud op t zin en was blied over aal t goie dat de HEER aan David en Salomo en aan zien volk Israël doan haar.