2 Kronieken 8:1-11

⁰¹Twinneg joar laank het Salomo in schrip west mit t timmern van tempel veur de HEER en van zien aigen pelaais. ⁰²Hai begunde ook mit t oetbaauwen van de steden dij keunenk Churam hom geven haar en luit de Isrelieten doarin wonen. ⁰³Dou ging hai noar Hamat-Soba en nam dij stad mit geweld in. ⁰⁴Ook Tadmor dat in de woestijn ligt, luit e verstaarken en wieder ale steden in Hamat doar hai zien veurroaden opsloagen kon. ⁰⁵Van Boven-Bet-Choron en Beneden-Bet-Choron muik hai staarke steden mit muren en poorten mit störmbaalken. ⁰⁶Ook baauwde Salomo Baälat en aal de steden doar hai zien veurroaden opsloagen kon, en steden veur zien striedwoagens en peerdeboudel, en wieder ales wat hai mor baauwen wol in Jeruzalem, in Libanon en in zien haile keunenkriek. ⁰⁷Ale noazoaten van de Hethieten, de Amorieten, de Perizzieten en ook van de Chiwwieten en de Jebusieten dij nait bie Israël heurden, ⁰⁸mor dij in t laand bleven wazzen deurdat de Isrelieten heur nait om haals brocht haren, werden deur Salomo aan t waark zet veur herendainsten. Dat is zo bleven tot op t heden. ⁰⁹Isrelieten zulm werden nait veur t swoare waark indaild. Dij deden dainst as soldoaten, as legerofsieren, as ofsieren over de woagenmenners en t peervolk. ¹⁰ Doar wazzen ook twijhonderdfiefteg hoge amtenoars bie dij veur keunenk Salomo t volk bestuurden. ¹¹ Salomo luit farao zien dochter verhoezen van Davidstad noar t pelaais dat hai veur heur baauwd haar. Hai dochde: t Komt nait te pas dat ain van mien vraauwen in t hoes van David, keunenk van Israël, wonen zol. Steden doar de aark van de HEER hènbrocht was, binnen nou ja haailege steden.