2 Kronieken 7:11-22

¹¹ Dou Salomo t hoes van de HEER en t hoes veur de keunenk kloar haar, en aal wat hai bedocht haar veur de inrichten van t hoes van de HEER en zien aigen hoes veur mekoar haar, ¹² kwam de HEER midden in naacht in n gezicht bie hom. Hai zee: “Ik heb dien gebed heurd. Ik heb mie dit stee as ovverstee oetkozen. ¹³ As ik de hemel op slöt dou zodat ter gain regen vaalt, of as ik sprinkhoanen der op oet stuur om t laand koal te vreten, of as ik pest onder mien volk stuur, ¹⁴ en as dit volk, dat mien volk is, zok den deelgeft en beedt, as dat volk mie weer opzöcht en zok bekeert van zien kwoade wegen, den zel ik in de hemel toulustern. Ik zel heur zunden vergeven en heur laand weer beter moaken. ¹⁵ Ik zel mien ogen open hebben en mit mien oren lustern noar t gebed dat van dit stee tou mie komt. ¹⁶ Ik heb dizze tempel oetkozen en as haaileg stee aanveerd, zodat mien noam doar aiweg wonen kin, zodat mien ogen doar ales zain kinnen en mien haart doar aaltied touholden zel. ¹⁷ En wat diezulm aanbelangt, astoe veur mien ogen t aigenste pad lopen dust as dien voader David doan het, astoe ales dust, zo as ik die opdroagen heb, astoe die holdst aan mien wetten en geboden, ¹⁸ den zel ik zörgen dat dien keunenkstroon veur aaltied steveg staait, zo as ik dat aan dien voader David in n verbond touzegd heb: ‘Der zel aaltied n noazoat van die over Israël regaaiern.’ ¹⁹ Mor astoe en dien volk bie mie votlopen, as ie joe nait meer holden aan mien wetten en geboden dij ik joe veurholden heb, as ie achter aander goden aanlopen en veur dijent op knijen goan, ²⁰ den zel ik dit volk votjoagen van t laand òf dat ik heur geven heb, den zel ik dizze tempel doar ik mien noam aan verbonden heb, van mie òf gooien, den zel ik zörgen dat dit hoes veur ale volken n hoes van spot en schaande wordt. ²¹ Elk dij der langs komt, zel zok over dit geweldege hoes haildaal verbiesterd ofvroagen: ‘Woarom het de HEER zukswat doan mit dit laand en dizze tempel?’ ²² En lu zellen antwoorden: ‘Omdat ze de HEER, de God van heur veurolden, dij heur tou t laand Egypte oethoald het, in steek loaten hebben, omdat ze zok aan aander goden verbonden hebben en veur dijent op knijen goan binnen en dij daind hebben, doarom het de HEER aan dit volk dizze ramp bezörgd!'”