2 Kronieken 6:22-31

²² As ain zok tegen zien noaber misdroagen het en dij noaber vragt van hom dat e zokzulm vervlökt en hai komt den in tempel veur t altoar om zokzulm te vervluiken, ²³ heur den van de hemel oet en dou wat! Oordail over joen knechten! Wèl schuld het, straf dij en geef hom wat e verdaind het. Mor wèl gain schuld het, spreek dij vrij en dou hom recht. ²⁴ As joen volk Israël deur de vijand versloagen is, omreden ze hebben tegen joe zundegd, en as ze den tou inkeer kommen en joen noam priezen en in dizze tempel kommen om te beden en te smeken, ²⁵ heur den van de hemel oet. Vergeef de zunden van joen volk Israël en breng ze weer noar t laand dat ie heur en heur veurolden geven hebben. ²⁶ As de hemel op slöt zit en t geft mor gain regen, omreden joen volk het tegen joe zundegd, mor as zai den toch op dit stee kommen om te beden en joen noam te priezen en om heur levent te betern, omdat ie heur onder handen nomen hebben, ²⁷ heur den van de hemel oet, vergeef de zunden van joen knechten, joen volk Israël. Wies heur de goie weg doar ze langs goan mouten en loat ter weer regen kommen over joen laand dat ie joen volk in aigendom geven hebben. ²⁸ As ter honger of pest in t laand komt, as ter koornbraand, meeldaauw of vroatzuchtege grashippers over t gewas kommen, as t volk in aigen steden deur vijanden beloagd wordt, of as ter ploagen of zaiktes over t laand kommen, ²⁹ as ter den ook mor ain man oet joen haile volk Israël in aal zien verdrait en ellèn zien smeekbeden tou joe richt en zien handen noar dizze tempel oetstekt, ³⁰ heur den van de hemel oet, van t vaaste stee doar ie wonen, en vergeef! Dou mit elk van heur noar wat ze doan hebben, ie waiten ja wat ter in elks haart omgaait. Ie binnen de ainegste dij t haart van menskenkinder kent. ³¹ Den zellen zai heur haile levent laank ontzag veur joe hebben en t levent laaiden zo as ie dat willen, in t laand dat ie ons veurolden geven hebben.