2 Kronieken 6:1-11

⁰¹Dou zee Salomo: “HEER, ie hebben onnaaierd dat ie in duustere dook wonen wollen. ⁰²Doarom heb ik n vernoam hoes veur joe zetten loaten, n vaaste woonstee veur aaltied.” ⁰³Keunenk draaide zok om en zegende de haile gemainschop van Israël. Ze wazzen der aalmoal bie stoan goan, ⁰⁴en hai zee: “Te priezen is de HEER, de God van Israël, dij mit zien handen doan het, wat hai mit zien mond beloofd haar aan mien voader David: ⁰⁵‘Van dag òf aan dat ik mien volk Israël tou Egypte oetlaaidde, haar ik mie oet ale stammen van Israël nog gain stad oetkozen om der n tempel baauwen te loaten doar mien noam wonen zol. Ook haar ik nog gain man oetkozen om vorst te wezen over mien volk Israël. ⁰⁶Mor nou heb ik Jeruzalem oetkozen om doar mien noam te vestegen en ik kais ook David oet om over mien volk Israël te regaaiern.’ ⁰⁷Mien voader David was vervaast van plan n tempel te baauwen veur de noam van de HEER, de God van Israël. ⁰⁸Mor de HEER zee tegen hom: ‘Dat is mooi van die dastoe vaast van plan bist om n tempel veur mien noam te baauwen. ⁰⁹Toch zel dij tempel nait deur die baauwd worden, mor dien aigen zeun dij nog geboren worden mout, dij zel veur mien noam dat hoes baauwen.’ ¹⁰ Zo het de HEER zok aan zien woord holden. Ik heb mien voader David opvolgd en zit nou op de troon van Israël, krekt zo as de HEER t beloofd haar, en ik heb veur de noam van de HEER, de God van Israël, n tempel baauwd. ¹¹ Doar heb ik de aark zien stee geven, doar t bewies van t verbond mit de HEER in ligt dat hai mit de Isrelieten sloten het.”