t Evengelie volgens Lucas 17: 1-10

⁰¹Hai zee tegen zien leerlingen: “Verlaaidens kinnen nait oetblieven. Mor o wai wèl of dij op zien gewaiten het!
⁰²Hai kon beter mit n meulenstain om haals in zee gooid wezen, as dat e ain van dizze lutjen aanlaaiden geven zol.
⁰³Geef acht op nkander!
As joen bruier zundegt, vermoan hom. Muit hom t, den vergeef hom.
⁰⁴Alderdeegs as e op n dag zeuvenmoal tegen joe zundegt en zeuvenmoal bie joe weer komt en zeg : ’t Muit mie!’ – den mout ie hom vergeven!”

⁰⁵Apostels zeden tegen de Heer: “Geef ons den meer geleuf!”
⁰⁶Mor de Heer zee: “As ie n geleuf haren as n mosterdzoadje den zol ie tegen dizze moerbijboom zeggen: ‘Riet die tou grond oet en poot die in zee!’ en hai zol joe geheurzoam wezen.

⁰⁷Wèl van joe zel tegen zien knecht dij veur hom plougt of op t vij paast, zeggen as e van t laand thoeskomt: ‘Kom vot hier bie toavel.’
⁰⁸Mor zol e nait tegen hom zeggen: ‘Moak mien eten kloar. Dou n schoet veur en bedain mie. As ik t etendrinken doan heb, kinstoe eten en drinken!’
⁰⁹Zol e knecht der bie gevaal veur bedaanken dat e dee wat of hom besteld was?
¹⁰ Zo mout ie ook, as ie t aal doan hebben wat of joe besteld is, zeggen: ‘Wie binnen onnudde knechten. Wie hebben bloots doan wat of wie doun mozzen!’”