2 Kronieken 4:11-5:1

¹¹ Churam muik ook nog potten en schoppen en ovverschuddels. Dou was hai kloar mit aal t waark, dat hai veur keunenk Salomo aan t hoes van God doun zol. ¹² Dat wazzen de twij zoelen, de twij ronde kapitélen bovenaan de zoelen, en de twij vlechtstokken om de ronde kapitélen bovenop de zoelen te bedekken; ¹³ vaaierhonderd grenoatappels dij in twij riegen ophongen wazzen aan elk van baaide vlechtstokken om de ronde kapitélen op de zoelen. ¹⁴ Wieder muik hai de onderstellen mit de waskevoaten doarop, ¹⁵ de Zee, dat is dij aine grode wotterkoep, mit de twaalf koubaisten der onder, ¹⁶ de potten en schoppen en vörken. Dit aalmoal mitnkander was deur meester Churam in opdracht van keunenk Salomo van glimmend koper en brons moakt. ¹⁷ In de Jordaanleegte tussen Sukkot en Seredata, haar keunenk ze in laimen vörms gaiten loaten. ¹⁸ Salomo haar van aal dij dingen n hail bult moaken loaten, der wer nait op t gewicht aan brons keken. ¹⁹ Wieder luit Salomo aal t schuddelgoud veur t hoes van God moaken, en t golden altoar en de toavels veur de teunbroden, ²⁰ en de mit gold besloagen kandeloars en lampen; dij mozzen volgens veurschrift branden veur de achterzoal. ²¹ Wieder nog de golden bloumen, lampen en snuters, aalmoal van t zuverste gold, ²² en boetendes nog de mèzzen, ovverschuddels, pannen en vuurtesten, aalmoal mit gold besloagen. Ook de deuren, de binnendeuren van t alderhaailegste, en de boetendeuren veur de grode zoal van tempel. ⁰¹Dou t waark van Salomo aan t hoes van de HEER kloar was, luit hai de wijgeschenken van zien voader David, t zulver, t gold en aal t schuddelgoud overbrengen en zette dat op stee in de schatkoamers van tempel.