⁰¹Volg mien veurbeeld, krekt as ik Christus zienent volg. ⁰²Ik geef joe der n kompelment veur dat ie in ales zo aan mie denken; en dat zo as ík joe t deurgeven heb, ie dóáraan vastholden. ⁰³Nou wil k joe dit inprenten: van elke man is Christus t hoofd; en t hoofd van vraauw is heur man; en t hoofd van Christus is God. ⁰⁴Elke man dij beedt of profetaaiert mit wat op kop, moakt zien hoofd te schaande. ⁰⁵Mor elke vraauw dij beedt of profetaaiert mit blode kop, moakt heur hoofd te schaande. Den is t net n koalschoren wicht. ⁰⁶As n vraauw niks op dut, kin ze t hoar der ook wel ofknippen. Mor as t veur n vraauw schoamachteg is t hoar òf te knippen of te scheren, den mout ze ook wat op doun. ⁰⁷n Man huift nait wat op te doun; hai vertegenwoordegt God ja en dij zien gezag. Mor in n vraauw kom ie t gezag van heur man tegen. ⁰⁸Man is ja nait tou vraauw oetnomen, mor aansom. ⁰⁹Man is ja ook nait schoapen om vraauw, mor aansom. ¹⁰ Doarom mout n vraauw (n taiken van) heur gezag droagen vanwegens engels. ¹¹ Mor t is wél zo: verbonden aan de Heer staait man net zo min lös van vraauw, as vraauw van man. ¹² Zo as vraauw tou man oetnomen is, zo komt man deur vraauw op wereld. Mor ales het God as oorsprong. ¹³ Goa nou mor ais bie joezulm te roade: is t fersounlek dat n vraauw mit blode kop tou God beedt? ¹⁴ As ie nou enkeld op joen noatuurlek gevuil ofgoan, den veracht ie n man toch as e t hoar laank het? ¹⁵ Mor het n vraauw dat, den heb ie veur heur respekt. t Hoar is heur ja geven as n ringmuur. ¹⁶ As ain t weer beter waiten wil: wié binnen t zo nait wènd, en net zo min God zien gemainte.