⁰⁸Dij bosschop doar kin je van op aan, en ik wil dastoe mensken dat verzekerst. Den kinnen wèl of in God leuven der om denken, dat ze veuroplopen mouten as ter wat gouds te doun is. Dat is mooi waark! Doar het t mensdom wil van! ⁰⁹Mor dat onzinneg gehakketak en dat oetpluzen van ofstammen, dat kifken en bekvechten over wet, hol die doar boeten. Doar het ja gain mensk wat aan en t het niks om hakken. ¹⁰ As ain op n ofsplitsen aanstuurt, loat hom den noa ain of twij woarschaauwens schaiten. ¹¹ Waist ja dat zo aine deurhèn verkeerd is en dat e zundegt tegen beter waiten in.

¹² As ik Artemas of Tychikus noar die toustuurd heb, dou den dien best bie mie te kommen in Nikopolis. k Heb ja besloten doar winter deur te brengen. ¹³ Span die der veur in dat wetgeleerde Zenas en Apollos aan raais kinnen. Zörg der veur dat ze naargens verlet om hebben. ¹⁴ Ook ons lu mouten leren t goie veurbeeld te geven, as ter neudeg wat doan worden mout. Aans zol heur levent ja gain vrucht droagen. ¹⁵ Groutnizzen van altmoal dij bie mie binnen. Groutnizzen aan wèl of ons in t geleuf laifhebben.