⁰⁵Mit t oog hierop heb ik die in Kreta blieven loaten: doe zolst zoaken doar wie nog nait aan toukommen wazzen in odder brengen en in elke stad oldsten aanstellen; en dat noar regels dij ik die oetstokt haar: ⁰⁶zolst noagoan of ter op zo ain niks aan te maarken is, of e zok bie ain vraauw holdt, of e geleuvege kinder het dij gain minne noam hebben om heur lösbandeghaid of dij nait om zeggen geven. ⁰⁷Der mag op n oldste niks aan te maarken wezen: hai mout ja de zoaken van God zien hoes regeln. Hai mag nait aigenwies wezen of kòrt veur de kop, gain klokjebruier of ain dij der vot inhaauwt, of dij t in zoaken nait zo naauw nemt. ⁰⁸Nee, hai mout gastvrij wezen, ain dij geern gouddut, zokzulm in haand het, recht deur zee gaait, vroom en moateg is. ⁰⁹Hai mout zok holden aan betraauwboare regel dij stemt mit ons leer. Den zel e ook in stoat wezen (aandern) aan te moudegen deur ze in gezonde leer te onderwiezen en wèl ons bestrieden n weerwoord te geven. ¹⁰ Der binnen ja n bult ongezeggelke lu. Mit proat dat niks om hakken het, nemen ze aandern beet. Ze kommen benoam oet Jeudse houk. ¹¹ Zokkent mout ie t swiegen opleggen. Haile femilies zetten ze ja op kop deur heur zoaken aan te proaten dij gain pas geven. t Is heur der om te doun mensken te roppen. ¹² Ain van heurent – heur aigen profeet nog wel – het zegd: “Onverbeterlieke leugenputen, dat volk van Kreta! Kwoaie baisten! Aans as vreten doun ze nait!” ¹³ Wat heur doar noageven wordt, is woar! Moak doarom kòrte metten mit heur. Meschain dat ze den op t punt van geleuf weer zond worden, ¹⁴ en zok nait laanger keren aan Jeudse verhoalen en aan wat of mensken heur opdroagen dij zok van woarhaid ofkeerd hebben. ¹⁵ Ales is zuver veur wèl zuver binnen. Mor veur wèl of onnuur en ongeleuveg binnen, is niks zuver. Heur verstand en heur gewaiten binnen baaident onnuur. ¹⁶ Ze zeggen dat ze God kennen, mor in heur doun en loaten valen ze hom òf. Mizzelke lu binnen t, dij nait lustern willen, nait geschikt om wat gouds te doun.