2 Kronieken 2:10-17

¹⁰ Keunenk Churam van Tyrus stuurde Salomo n braif mit bosschop: “Dat de HEER joe as keunenk over zien volk aansteld het, is n taiken dat hai doar wies mit is.” ¹¹ Wieder schreef Churam: “Lof aan de HEER, de God van Israël, dij de hemel en de haile wereld moakt het. Hai het aan keunenk David ja n zeun geven mit zoveul wieshaid, inzicht en verstand van zoaken, dat dij n tempel veur de HEER baauwen kin en n keunenkliek pelaais veur zokzulm. ¹² Doarom stuur ik joe n kloare vakman, ain mit n groot verstand; dij hait meester Churam. ¹³ Zien moeke is ain oet de stam van Dan en zien voader komt oet Tyrus. Hai is kloar in t waark mit gold en zulver, mit brons en iesder, mit stain en holt. Hai is bekwoam in t waark mit roodsangen, blaauwsangen en helderrode wol en fienweefd linnen en hai het t holtsnieden in de vingers. Hai kin ale taikens moaken van wat ie mor hebben willen. Hai kin soamenwaarken mit joen vaklu en mit dij van mien heer, joen voader David. ¹⁴ Stuur ie, mien heer, de waait, gaarst, eulie en wien doar ie t over had hebben, mor aan ons, joen knechten. ¹⁵ Den zel wie bomen kappen op Libanon, net zoveul as ie neudeg hebben. Dij zel wie mit vlötten over zee noar Jafo voaren, den kin ie dij noar Jeruzalem brengen.” ¹⁶ Salomo luit aal t vremd volk tellen dat dou in t laand Israël was, zo as ook zien voader David doun loaten haar. Der bleken honderddrijenfieftegdoezend zèshonderd man te wezen. ¹⁷ Seuventegdoezend doarvan luit e dainstdoun as sjaauwerlu, tachtegdoezend as stainhaauwers in de baargen, en zèsendatteghonderd as opzichters om t volk aan t waark te holden.