1 Kronieken 29:10-20

¹⁰ Dou prees David de HEER en de haile gemainte was der getuge van, dou hai zee: “Aan joe komt lof tou, HEER, God van ons veurvoaders, veur aaid en aiweg. ¹¹ Van joe, HEER, is ale groothaid en macht, ale glorie, glaans en heerlekhaid. Van joe, HEER, is aal wat ter is in de hemel en op de haile wereld. Van joe, HEER, is t keunenkriek, van joe, dij boven ales oetstekt. ¹² Riekdom en eer binnen van joe ofkomsteg. Ie regaaiern ales, mit macht en kracht in handen. Ie hebben t in handen om ain groot en staark te moaken. ¹³ Doarom, ons God, wie daanken joe en priezen joen heerleke noam. ¹⁴ Wèl bin ik den, wat is mien volk, dat wie mor zo, oet vrije wil joe zokse goaven geven kinnen? t Komt aalmoal ja van joe! Wie geven t aan joe, oet joen aigen haand. ¹⁵ Wie binnen ja mor vremden, wie binnen bie joe te gast, net as aal ons veurolders. Ons bestoan op dizze wereld gaait as n schaar verbie en het gain vasteghaid. ¹⁶ HEER, ons God, aal dij riekdommen dij wie bie nkander zammeld hebben om veur joen haailege noam n hoes te baauwen, heb wie ja eerst oet joen haand kregen. Ales heurt joe tou. ¹⁷ Ik wait ja, mien God, dat ie ons haart oetperbaaiern, dat ie oprechthaid op pries stellen. Ik heb joe dit aalmoal geern en mit n oprecht haart geven en t het mie slim deugd doan dou ik zag hou joen volk dat hier touholdt, joe oet vrije wil zien goaven brochde. ¹⁸ HEER, God van ons veurolders Abraham, Isaak en Israël, hol dizze genegenhaid in t haart van joen volk veur aaltied vaast en loat dat haart zok richten op joe. ¹⁹ Loat mien zeun Salomo joen geboden, regels en wetten mit zien haile haart in eren holden en ales doun om börg te baauwen dij ik taikend heb.” ²⁰ Dou zee David tegen de haile gemainschop: “Pries nou de HEER, joen God.” De haile gemainschop prees dou de HEER, de God van heur veurolders. Ze gingen op knijen en bogen zok daip veur de HEER en veur de keunenk.