1 Kronieken 28:11-21

¹¹ Dou langde David aan zien zeun Salomo bestek en baauwtaikens over van de tempelveurhal mit ale roemtes doaromtou, mit schatkoamers, bovenzoalen, binnenkoamers en de zoal veur t verzoendeksel. ¹² Wieder gaf hai hom taikens veur ales wat hai der bie bedocht haar veur de tempelhoven van t hoes van de HEER en ale zoalen doaromtou, de schatkoamers van t hoes van God en de schatkoamers veur de wijgeschenken. ¹³ Doarbie liesten veur de indailens van t waark van de priesters en Levieten, veur aal t dainstwaark in t hoes van de HEER en veur aal t raif dat doarveur neudeg was. ¹⁴ Veur aal t schuddelgoud en aal t aander raif dat veur elke dainst apaart neudeg was, gaf hai sekuur t gewicht in gold en zulver op: ¹⁵ t gewicht aan gold veur de golden kandeloars mit heur lampen en t gewicht aan zulver veur de zulvern kandeloars mit heur lampen; dat gewicht hong der van òf woar ze veur bruukt werden. ¹⁶ Wieder t gewicht aan gold veur elk van de toavels veur t ovverbrood en t gewicht aan zulver veur de zulvern toavels; ¹⁷ t gewicht aan zuver gold veur de vörken, veur de ovverschuddels en de kannen, en t gewicht aan gold veur elk van de golden bekers en aan zulver veur elk van de zulvern bekers; ¹⁸ wieder t gewicht aan zuver gold veur t wierookaltoar en t gewicht aan gold veur t moaken van de woagen en van de cherubs dij heur vleugels oetspraaiden om de aark van t verbond òf te schaarmen. ¹⁹ “Dat staait aalmoal in t geschrift dat ik van de HEER kregen heb en woarin hai mie aanwiezens geven het, hou of t plan oetvoerd worden mout.” ²⁰ Dou zee David tegen zien zeun Salomo: “Wees staark en heb keroazie, aan t waark! Wees nait benaauwd en loat die gain schrik aanjoagen! Want de HEER, mien God, is ja bie die. Hai lopt nait bie die vot. Hai let die nait in steek, veur dastoe kloar bist mit aal t waark veur de dainst in t hoes van de HEER. ²¹ De ofdailens van priesters en Levieten stoan kloar veur aal t waark in t hoes van God. Veur ale soorten waark kinstoe reken op vaklu dij die oet vrije wil helpen willen. Ook t haile volk en zien laaiders willen die geern helpen bie aal wat ter te doun is.”