⁰¹Salomo luit ook n bronzen altoar moaken van twinneg èl laank, twinneg èl braid en tien èl hoog. ⁰²Wieder luit hai doarveur de Zee gaiten, n koep mit n deursnee van tien èl, haildaal rond en vief èl hoog en n omtrek van datteg èl. ⁰³Aan boetenkaant, haildaal rondomheer, wazzen reliëfs van koubaisten goten, tien op n èl en twij riegen boven nkander, dij in ain stok mit de Zee goten wazzen. ⁰⁴Dij koep ston op twaalf koubaisten: drij koien keken noar t noorden, drij noar t westen, drij noar t zuden en drij noar t oosten. De Zee ston bovenop heur en achterènden stonden noar t midden tou. ⁰⁵Waand van koep was n handbraid dik, raand haar vörm van raand van n beker, vörm van n leliekelk. Der kon drijdoezend bat wotter in. ⁰⁶Hai luit ook nog tien waskevoaten moaken: vief zette hai aan rechterkaant en aander vief aan linkerkaant; dij wazzen veur t ofwasken. In dij bakken wer t raif schoonmoakt dat bie t brandovver bruukt was. De Zee was allain bestemd veur de priesters om zok te wasken. ⁰⁷Hai luit tien golden kandeloars moaken volgens veurschrift en dij zette hai in de grode zoal, vief aan rechterkaant en vief aan linkerkaant. ⁰⁸Wieder luit hai tien toavels moaken dij ook in tempel zet werden, vief aan rechterkaant en vief aan linkerkaant. Boetendes luit hai nog honderd golden ovverschuddels moaken. ⁰⁹Ook legde hai n binnenploats aan veur de priesters en n groot veurhòf mit poortdeuren, dij mit brons besloagen werden. ¹⁰ De Zee kwam op rechterzied van t hoes, in t zuudoosten.