⁰¹Dou begunde Salomo in Jeruzalem mit t baauwen van t hoes van de HEER. Dij kwam op Moria, baarg doar de HEER zok aan zien voader David zain loaten haar, op t stee dat David der veur bestemd haar, op dörsdeel van de Jebusiet Ornan. ⁰²Hai begunde mit t baauwen op de twijde dag van twijde moand, van t vaaierde joar dat hai regaaierde. ⁰³t Grondplan van tempel van God, zo as Salomo dat oetzet haar, was sesteg èl laank en twinneg èl braid, rekend noar de olde moat van de èl. ⁰⁴Veurhal dij in t verlengde van grode zoal ston, was twinneg èl laank, net zo laank as de brette van tempel, en honderdtwinneg èl hoog; binnenkaant wer mit zuver gold besloagen. ⁰⁵Wanden van grode tempelzoal luit hai mit ciprezzenholt oftimmern en mit zuver gold besloagen; doar werden weer paalmtoeken en slingers op aanbrocht. ⁰⁶Haile tempel wer mit kostboare stainen versierd. t Gold kwam oet Parwaïm. ⁰⁷Zo werden ook de baalken, drumpels, wanden en deuren van grode tempelzoal mit gold besloagen en op de wanden wer holtsniewaark mit cherubs aanbrocht. ⁰⁸Wieder luit hai de zoal van t alderhaailegste inrichten. De lengte doarvan, langs de kòrte kaant van tempel bemeten, was twinneg èl en de brette was ook twinneg èl. Hai besluig dij mit zuver gold tot n gewicht van zèshonderd talent. ⁰⁹De spiekers wogen fiefteg sjekel aan gold. Bovenzoalen werden ook mit gold besloagen.