Eerste braif aan Korintiërs 11:17-34

¹⁷ Nou k joe toch dit veurschrift geef, krieg ie der van mie gain kompelment veur dat joen soamenkomsten meer bedaarven as gouddoun. ¹⁸ Allereerst dit: as ie as gemainte bie nkander kommen, vaal ie oetnkander in koppels, zo heur ik. En doar zel, denk ik, wel wát van aan wezen. ¹⁹ Der mouten maank joe ja wel pertijen wezen, wil aan t licht kommen wèl of ter maank joe solied binnen. ²⁰ Nou, as ie den bie nkander kommen, is ter van eten van de Heer zien moaltied gain sproake. ²¹ Bie t eten pakt elk ja, veurdat n aander der aankommen kin, t etendrinken dat e zulm mitnomen het. Van dij gevolgen dat ain honger het en aander doen is. ²² Ie hebben toch vaast wel hoezen doar ie etendrinken kinnen? Of hoal ie neus op veur God zien gemainte, dat ie aarme lu sneu moaken duren? Wat mout ik doar nou van zeggen? Joe n kompelment geven? Nee, hier heb k gain goud woord veur over! ²³ Ik heb van de Heer deurkregen – en dat heb k joe ook deurgeven – dat ons Heer Jezus in dij naacht dou e verroaden wer, n brood pakte. ²⁴ Dou e der veur daankt haar, brook e t en zee: “Dit is mien liggoam veur joe! Dou dat as n aandenken aan mie.” ²⁵ Net zo pakte hai noa t eten beker ook en zee: “Dizze beker is t nije verbond in mien bloud. Zo voak as ie doar oet drinken, mout ie dat doun as aandenken aan mie. ²⁶ Zo voak as ie ja dat brood eten en oet dij beker drinken, moak ie de Heer zien dood bekend, net zo laank tot e komt. ²⁷ Dat zodounde: wèl of onvoug de Heer zien brood et of oet zien beker drinkt, dij zel aansproakelk wezen veur de Heer zien liggoam en bloud. ²⁸ Doarom mout men zokzulm noagoan en den eerst van t brood eten en oet beker drinken. ²⁹ Wèl et of drinkt, dij hoalt ja mit dat eten en drinken zok n veroordailen op haals as e t liggoam nait veurkómmend behandelt. ³⁰ Doarom binnen der maank joe zo’n bult mensken zaik en aan t sukkeln en staarven der nog al wat. ³¹ Mor as wie nkander veurkómmend behandelden, zol we ook nait bestraft worden. ³² Toch vudt de Heer ons op deur dij bestravven, om veur te kommen dat we mit wereld veroordaild worden zollen. ³³ Nou den, mien bruiers en zusters, as ie bie nkander kommen om te eten, onthoal nkander den.