t Evengelie volgens Lucas 3:10-20

¹⁰ Dou vruigen lu hom: “Wat mout wie den doun?” ¹¹ Hai gaf heur as antwoord: “Dij n dubbeld stel klaaier het, mout dailen mit wèl of gainent het. En wèl of eten het net zo.” ¹² Der kwammen ook tollenoars om zok deupen te loaten. Dij zeden tegen hom: “Meester, wat mout wie doun?” ¹³ Dou zee e tegen heur: “Niks meer nemen as wat vaststeld is.” ¹⁴ Soldoaten dij vruigen hom ook: “En wat mout wie doun?” Hai zee tegen heur: “Gain mensk bestelen en gainain geld ofdwingen, mor genougen nemen mit joen soldij.”

¹⁵ Dou t volk vol van verwachten was en zai zok aalmoal ofvruigen of Johannes zulm de Christus nait was, gaf e heur as antwoord: ¹⁶ “Ik deup joe mit wotter, mor der komt ain dij meer maans is as ik. Ik bin nog te min om raimen van zien sandoalen lös te moaken. Dij zel joe deupen mit hillege Gaist en mit vuur. ¹⁷ Hai het zoadwaan in haand om t koorn te schonen en den in zien schuur op te sloagen. Mor t kaf zel e opbranden mit vuur dat nooit oetgaait.”

¹⁸ Op alderhande menaaier gaf e t volk n inzeggen en brochde hai heur t evengelie. ¹⁹ Mor dou vörrelkeunenk Herodes deur hom bestraft wer om Herodias, vraauw van zien bruier, ²⁰ en om aal dij euveldoaden dij Herodes ommaans had haar, het e boetendes dit nog oethoald, dat e Johannes in t gevangenhoes stopt het.