1 Kronieken 29:21-30

²¹ Aanderdoags brochten zai de HEER slachtovvers en brandovvers: doezend jonge bollen, doezend rammen en doezend lammer, mit de wienovvers dij doar bie heurden. Veur t haile volk Israël werden dou verschaaiden baisten slacht. ²² Dij dag muiken zai groot feest en ze atten en dronken onder t oog van de HEER. Veur twijde moal raipen zai Salomo, David zien zeun, tot keunenk oet. Zai zaalfden hom veur de HEER tot vorst en Sadok tot priester. ²³ Zo kwam Salomo op de troon van de HEER en hai regaaierde as keunenk in stee van zien voader David. t Ging hom goud òf en hail Israël lusterde noar hom. ²⁴ Ale overstes, ale helden en alderdeegs ale aander zeuns van keunenk David, sworen traauw aan keunenk Salomo. ²⁵ De HEER muik Salomo groot in aanzain en in keunenklieke macht veur de ogen van hail Israël, zo as nog nooit veur hom ain keunenk west haar. ²⁶ David, zeun van Isaï, het over hail Israël regaaierd. ²⁷ Hai regaaierde vatteg joar laank over Israël, zeuven joar van Hebron oet en drijendatteg joar van Jeruzalem oet. ²⁸ Hai kwam op hoge olderdom oet tied, noa n bandeg levent vol riekdom en eer. Zien zeun Salomo wer keunenk in zien stee. ²⁹ De geschiedenis van keunenk David staait van t begun tot t èn beschreven in de verhoalen over de profeet Samuël, de profeet Natan en de profeet Gad. ³⁰ Doar staait zien keunenkliek bestuur en zien macht in beschreven en ales wat hom, Israël, en ale aander keunenkrieken op wereld, in dij tieden overkommen is.