⁴¹ Zien olders muiken elk joar mit Pesach n raais noar Jeruzalem. ⁴² Dou e twaalf joar worden was, trokken ze der hèn zo as bie t feest gebruuk was. ⁴³ Dou ze noa ofloop van feestdoagen weer op hoes aan gingen, bleef t kind Jezus in Jeruzalem achter zunder dat zien olders der aarg in haren. ⁴⁴ Ze raaisden n dag deur, omreden ze dochten hai was bie t raaisgezelschop en zöchten hom maank femilie en bekenden. ⁴⁵ Dou ze hom nait vonden, gingen ze weer noar Jeruzalem tou om hom te zuiken. ⁴⁶ Drij doag noa tied vonden ze hom in tempel. Doar zat e middenmaank leroars te lustern en te vroagen. ⁴⁷ Elk dij hom heurde, ston versteld over zien inzicht en zien antwoorden. ⁴⁸ Dou ze hom zagen, wazzen ze ontdoan. Zien moeke zee tegen hom: “Kind, hou konst ons dat aandoun? Dien voader en ik lopen ja doodongerust noar die te zuiken.” ⁴⁹ Dou zee e tegen heur: “Hou kon ie noar mie zuiken? Wos ie den nait dat ik dounde wezen mout mit t waark van mien Voader?” ⁵⁰ Mor zai begrepen nait wat of e mainde mit dij woorden. ⁵¹ En hai ging mit heur weerom noar Nazaret tou en bleef heur geheurzoam. Zien moeke onthuil aal dij zoaken en dochde der daip over noa. ⁵² Jezus wer mit de joaren groder en wiezer. Hai kwam aal meer in gunst bie God en mensken.