t Evengelie volgens Lucas 20 : 9 – 19

⁰⁹Dou keerde e zok noar t volk en vertelde heur dizze geliekenis: “Der was es ain, dij n droevetoen aanlegde. Hai verpachtte hom aan wienboeren en dou ging e n haile toer tou t laand oet.
¹⁰ Dou tied ter heer was, stuurde hai n knecht noar zien pachters tou, dat ze zollen hom zien paart van toenopbrengst betoalen. Mor ze raanzelden hom òf en stuurden hom mit lege handen weerom.
¹¹ Hai luit t ter nait bie en stuurde nog es weer n knecht. Dij raanzelden ze ook òf, beschimpten hom en stuurden hom mit lege handen weerom.
¹² Nog luit e t ter nait bie en stuurde n daarde. Mor dij toakelden ze ook tou en smeten hom tou droevetoen oet.
¹³ Dou zee boas van droevetoen: ‘Hou mout ik ter nou mit aan? k Zel mien alderlaifste jong sturen. Dij zellen ze ja wel mieden!’
¹⁴ Mor dou pachters hom aankommen zagen, stoken ze koppen bie nkander en zeden: ‘Dat is aarfgenoam! Loat wie hom doodmoaken. Den is aarvenis veur ons!’
¹⁵ Ze smeten hom tou toen oet en muiken hom dood. Wat zel boas van toen den mit heur doun?
¹⁶ Hai zel kommen, dij pachters ombrengen en droevetoen aan aandern geven.” Dou ze dat heurden zeden ze: “Nooit van zien levensdoagen!”
¹⁷ Mor hai keek heur stief aan en zee: “Wat bedudt dij tekst den: ‘Stain dij amtslu ofkeurd haren, dij is as houkstain bruukt’?
¹⁸ Elk dij doarover stroekelt, dij vaalt te pletter. En as ain hom op kop krigt, dij wordt vermorzeld!”
¹⁹ Schriftgeleerden en opperpriesters perbaaierden op dat aigenste ogenblik hom op te pakken. Mor ze wazzen baang veur t volk. Ze haren ja wel deur dat e mit dizze geliekenis heur maind haar.