Deuteronomium 24:1-9

⁰¹As n man n vraauw traauwd het en zai staait hom nait meer aan omdat hom wat nait zint, den schrift hai n schaaidbraif. Hai geft heur dij en stuurt heur tou t hoes oet.
⁰²As ze votgoan is en mit n aander traauwt
⁰³en ook dij man krigt n ofkeer van heur, den geft hai heur ook n schaaidbraif en stuurt heur vot. As leste man dij mit dizze vraauw traauwd is oet tied komt,
⁰⁴den mag eerste man dij heur votstuurd het, nait weer mit heur traauwen – zai is onraain worden. Want dat is n ofgries veur de HEER. Ie zellen gain zunde brengen over t laand dat de HEER, joen God, joe as aarfdail geven zel.

⁰⁵As ain n vraauw traauwd het, huift hai nait mit t leger oetrukken. Hai huift nait opkommen, n joar laank zel hai vrij wezen, hai kin den thoesblieven om vraauw dij hai traauwd het, blied te moaken.

⁰⁶Haandmeulen of bovenste meulenstain mag ie nait as paand nemen, want den nemt men ja t levent zulm as paand.

⁰⁷As ain trappaaierd wordt op t roven van n mensk en ain van zien bruiers, ain van Israël, as sloaf behandelt en verkocht, den mout dij daif staarven. Zo mout ie t kwoad oet joen midden votdoun.

⁰⁸As ploag van meloatshaid joe treft, denk den goud om wat Levitische priesters joe veurschrieven; wat ik joe veurschrief zel ie stipt noakommen.
⁰⁹Denk ter aan wat de HEER, joen God, Mirjam aandoan het tiedens oettocht oet Egypte.