Lucas 10:25-37

²⁵ Dou kwam der n wetgeleerde aanzetten dij hom in verlegenhaid brengen wol. Hai zee: “Meester, wat mout ik doun om t aiwege levent te aarven?”
²⁶ Jezus zee tegen hom: “Wat staait ter in wet? Wat lees ie doar?”
²⁷ Hai antwoordde: “Ie zellen de Heer, joen God, laifhebben mit joen haile haart, mit joen haile zail en mit aal joen kracht en mit aal joen verstand, en joen noaste as joezulm.”
²⁸ Hai zee tegen hom: “Dat heb ie goud zegd! Hol joe der aan. Den zel ie leven.”
²⁹ Mor hai wol zok grootholden en zee tegen Jezus: “En wèl is mien noaste den?”
³⁰ Doar ging Jezus op in. Hai zee: “Der was ain onderwegens van Jeruzalem noar Jericho tou. Hai vuil in handen van rovers, dij hom oetschudden deden. Boetendes gavven ze hom ook nog sloag. Dou ze votgingen luiten ze hom haalfdood liggen.
³¹ Dou wol t gevaal dat ter n priester langs kwam. Dij zag hom en ging der mit n boog omtou.
³² Net zo n Leviet: hai kwam doar langs, zag hom en ging der mit n boog omtou.
³³ Mor n Samaritoan, dij op raais was, kwam der ook langs. En dou hai hom zag, kreeg e mit hom te doun.
³⁴ Hai ging noar hom tou en verbon zien wonden, doar e eulie en wien op dee. Hai zette hom op zien aigen daaier, brochde hom in n haarbaarg en zörgde wieder veur hom.
³⁵ Aanderdoags dou e votging, gaf e kastelaain twij schellenks en zee: ‘Zörg veur hom. As ie meer kostens hebben den zel ik joe op weeromraais betoalen.’
³⁶ Wat ducht joe, wèl van dizze drijent het zok as noaste gedroagen van man dij in handen van rovers valen was?”
³⁷ Hai zee: “Dij barmhaarteg veur hom west het.” Jezus zee: “Goa hèn en dou ie net zo!”