Lucas 22:1-13

⁰¹Nou was t Pesach op handen, zo haitte t feest van Broden-zunder-gèst.
⁰²Opperpriesters en schriftgeleerden wazzen op zuik hou of ze hom van kaant moaken konden. Ze wazzen ja baang veur t volk.
⁰³Dou kreeg Soatan Judas, dij Iskariot nuimd wer, ain van de twaalm, in zien macht.
⁰⁴Hai ging hèn en pruit mit opperpriesters en bevelhebbers hou of e hom aan heur oetlevern zol.
⁰⁵Dat ston heur wel aan. En ze stemden der in tou dat ze hom geld geven zollen.
⁰⁶Doar ging hai mit akkoord en hai zöchte noar n goie gelegenhaid hom aan heur oet te levern boeten t volk om.

⁰⁷Dou dag kwam van Broden-zunder-gèst, dat t pesachlaam ovverd worden mos,
⁰⁸stuurde hai Petrus en Johannes der op oet en druig heur op: “Goa hèn en moak veur ons t pesachmoal kloar, dat we t eten kinnen.”
⁰⁹Ze zeden tegen hom: “Woar wol ie dat we t kloarmoaken?”
¹⁰ Hai zee tegen heur: “Heur es! As ie stad ingoan, zel n man joe in muit kommen dij n kroek mit wotter dragt. Goa mit hom tou t hoes in doar hai ingaait.
¹¹ Doar mout ie tegen aigender van dat hoes zeggen: ‘Meester let joe vroagen: woar is dij zoal doar ik mit mien leerlingen t pesachmoal holden kin?’
¹² Hai zel joe boven n grode, bemeubelde zoal aanwiezen. Moak t doar kloar.”
¹³ Ze gingen vot en vonden t net zo as hai tegen heur zegd haar. En ze muiken t pesachmoal kloar.