¹¹ God zien genoade kwam ja opdoagen as n oetkomst veur ale mensken ¹² deurdat ze ons der tou opvudt, dat we ons goddeloze levent ter aan geven en ons wereldse lusten en dat we bedachtzoam, rechtschoapen en vroom leven in dizze wereld, ¹³ omdat we n zoalege toukomst verwachten, noamelk dat ons grode God en redder, Jezus Christus, mit stoatsie verschienen zel. ¹⁴ Hai het zok veur ons opovverd, dat e ons vrijmoaken zol van aal wat tegen (God zien) wet ingaait en zok zo n keurvolk der oet schonen, dat zok ter op toulegt goud te doun. ¹⁵ Dat mostoe heur veurholden. Most heur aanpittjen en terechtwiezen. Doar hestoe ale volmacht tou. Loat gainain t woagen op die deel te kieken.

⁰¹Herinner heur der hailtied weer aan dat ze wèl of regaaiern en gezag droagen, onderdoaneg wezen mouten, dat ze dij geheurzoamen mouten en kloarstoan om wat gouds te doun, netgliek wat. ⁰²Dat ze gainain oetschelden maggen, gain roeziemoaken, mor zok fersounlek gedroagen en elkenain veurkommend behandeln mouten. ⁰³Vrouger bruukten wie ja ook ons verstand nait, wazzen ongezeggelk, op biesterboan en versloafd aan alderhande zinnen en lusten. Wie verdeden ons tied mit lèlke streken en ofgunst, wazzen lu om van te waalgen en konden mekoar nait oetstoan. ⁰⁴Mor dou kwam aan t licht hou goud of God, ons redder, wel nait is en houveul of hai van t mensdom holdt. ⁰⁵Nait, dat wie t ter noar moakt haren deur ons rechtschoapen gedrag. Nee, t begrootte hom om ons. Doarom het hai ons dou red deur ons zo te wasken, dat wie vannijs geboren werden en dat hillege Gaist nije mensken van ons muik. ⁰⁶Dij Gaist het e rij over ons oetgoten deur Jezus Christus, ons redder. ⁰⁷Den kon we, deur zien genoade vrijsproken, aarfgenoamen worden mit oetzicht op aiweg levent.